تعمل إيه لو رحت تقدم على قرض والبنك رفض؟
تعمل ايه لو قدمت على قرض من البنك واترفضت؟ وإيه أصلا الأسباب اللي ممكن تخليك تاخد رفض ؟ وهل ده معناه إن باب القروض اتقفل في وشك للأبد؟ .. وإيه حكاية الـ "آي سكور" اللي كل البنوك بتتكلم عنه؟ في التقرير ده هنجاوب على كل الأسئلة دي وأكثر .. وهنعرف إزاي تتعامل مع الرفض ده عشان تضمن موافقة البنك المرة الجاية.
البنك المركزي عمل حاجة اسمها "الشركة المصرية للاستعلام الائتماني" أو المعروفة باسم "آي سكور" .. مهمتها إنها تجمع كل البيانات الائتمانية بتاعتك.. يعني كل القروض اللي خدتها قبل كده .. كل الأقساط اللي دفعتها في ميعادها أو اتأخرت عليها .. كل ده بيتسجل عندها و بناءً على البيانات دي بيتم عمل تقييم ائتماني ليك .. وده اللي بيحدد "الآي سكور" بتاعك.. كل ما كان الـ "آي سكور" بتاعك أعلى .. كل ما كانت فرصتك في انك تاخد قرض أحسن.
طب إيه هي الأسباب اللي ممكن تخلي البنك يرفض طلب القرض بتاعك؟
فيه أسباب كتير ممكن متكونش واخد بالك منها زي ان الـ "آي سكور" بتاعك مش كويس: وده معناه إن تاريخك الائتماني مش مبشر بالنسبة للبنك.. ممكن تكون اتأخرت في سداد أقساط قروض قبل كده .. أو عندك قروض كتير مفتوحة .. أو حصلت مشكلة معاك في بنك قبل كده.
ومن الأسباب كمان ان ممكن مرتبك يكون مش كافي لسداد القرض.. البنك بيحسب نسبة معينة من مرتبك تقدر تسدد بيها الأقساط.. لو القرض اللي طالبه القسط بتاعه أعلى من النسبة المسموح بيها من مرتبك .. البنك هيرفض طلبك..و البنك دايماً بيحاول يتأكد إنك عندك القدرة على السداد من غير ما ده يأثر على معيشتك.
وممكن كمان القرض يترفض لو وظيفتك مش مستقرة أو مدة شغلك قليلة.. البنوك بتفضل العملاء اللي وظائفهم مستقرة ومدة عملهم طويلة .. ده بيدي البنك ثقة إن مصدر دخلك ثابت وهتفضل تسدد الأقساط. لو كنت لسه بادئ شغل جديد .. أو وظيفتك غير مستقرة .. ده ممكن يكون سبب للرفض.
كمان هتترفض لو الأوراق المطلوبة مش كاملة أو فيها مشكلة.. ساعات كتير بيكون الرفض سببه بسيط جداً .. إن فيه ورقة ناقصة .. أو بيانات غلط في الأوراق اللي قدمتها. لازم تتأكد إن كل المستندات المطلوبة منك كاملة وصحيحة.
كمان ممكن قرضك يترفض لو عندك مديونيات تانية عالية أو سنك لا يتناسب مع سياسة البنك.
طب لو القرض اترفص .. إيه اللي المفروض تعمله؟
رفض القرض مرة مش معناه إنه نهاية العالم ممكن يكون فيه فرصة إنك تاخده بعد ما تصلح الأسباب.. أهم خطوة هي إنك تسأل موظف البنك عن السبب الحقيقي لرفض القرض. معرفة السبب هتساعدك في إنك تصلحه.. ولو السبب هو الـ "آي سكور" .. حاول تسدد أي أقساط متأخرة عليك .. ومتتأخرش في أي مدفوعات مستقبلية. مع الوقت الـ "آي سكور" بتاعك هيتحسن.
و لو عندك قروض تانية كتير .. حاول تسدد جزء منها قبل ما تقدم على قرض جديد.. وممكن تطلب قرض بقيمة أقل تتناسب مع مرتبك..و لو كان الرفض بسبب الـ "آي سكور" أو ظروف معينة .. ممكن تستنى فترة .. مثلاً من 3 لـ 6 شهور .. وبعدين تقدم تاني بعد ما تكون صلحت الأوضاع دي.
