العلمين الجديدة.. عاصمة السياحة في البحر المتوسط ومفاجأة في صيف 2025
موقع العلمين الجديدة الفريد، خلاها حديث العالم كله، وخاصة في فصل الصيف، وده بعد ثورة 30 يونيو في عهد الرئيس السيسي، ده غير أنها بتشهد حاليا إقبال تاريخي في السياحة.. بس هل يا ترى هتنافس الغردقة وشرم الشيخ؟.. وإزاي الحكومة قدرت تستغلها عشان تدخل مليارات للسياحة في مصر؟
بعد ثورة 30 يونيو، الحكومة اهتمت جدا بمدينة العلمين الجديدة، وحولتها من حقول ألغام لأكبر مدينة ذكية في مصر، ده غير أنها بقت عاصمة السياحة في البحر المتوسط، والمفاجأة الصيف ده أن كل الفعاليات العالمية والمؤتمرات الاقتصادية اتحولت كلها للعلمين الجديدة.
العلمين الجديدة مش بس مجرد مدينة سياحية، دي بقت المقر الصيفي للحكومة كلها، ده غير أن فيها لإقبال تاريخي كل صيف بسبب موقعها الفريد، كمان متوقع أن موسم الصيف ده هيكون تاريخي لأن فيه منشآت فندقية وسياحية خلصت وبدأت تخش الخدمة.
العلمين الجديدة كل سنة بتتقدم والسعة الفندقية بتاعتها بتزيد، والعالم كله بيعرفها يوم عن يوم، ده غير أنها بتدخل مليارات كل سنة للسياحة، وده لأن آلاف السياح العرب والأجانب بيروحوا عشان يستمتعوا بالإجازة طوال فترة الصيف.
العلمين كمان بتشهد فعاليات وأنشطة ترفيهية وحفلات فنية، واللي بتجذب مئات الآلاف كل سنة من كل أنحاء الجمهورية ومن خارج مصر، ده غير رحلات اليوم الواحد وده بسبب أنك بتحتاج حوالي ساعتين ونص عشان توصلها من القاهرة، ومن الإسكندرية حوالي ساعة واحدة، وأقل من ساعتين لمحافظات الدلتا.
هل مساحتها كفاية لتنفيذ مشروعات اقتصادية وسياحية؟
مدينة العلمين الجديدة، 48 ألف فدان، وده مخطط من الدولة عشان تستوعب أكتر من 3 مليون نسمة، وبتتكون المرحلة الأولى من قطاعين أساسيين بمساحة 8 آلاف فدان وهما القطاع الساحلي ويشمل قطاع المركز السياحي العالمي، والقطاع الأثري والحضاري.. والدولة استثمرت 350 مليار جنيه في العلمين الجديدة.
العلمين كمان بتنافس الغردقة وشرم الشيخ، ودبي، وده لأن فيها منطقة الفنادق، واللي بتنافس أبراج دبي، وبيتعمل فيها احتفالات في المناسبات واللي اتكلفت الاستثمارات فيها عشرات المليارات، وإجمالي الفنادق فيها 296 فدان، واللي بتضم 15 ألف و500 غرفة، ده غير أنها بتضم المركز الطبي العالمي للاستشفاء والعلاج الطبيعي، واللي مساحته 45 فدان، ده غير المراكز التجارية ومنافذ البيع والمعارض والملاهي ومجمع السينمات والمسارح والنوادي الرياضية والخدمات الإدارية.
التطوير في العلمين الجديدة، شمل كمان تنفيذ قطار كهربا فائق السرعة، واللي بتوصل سرعته لـ 250 كيلومتر لربط مدينة 6 أكتوبر بمدينة العلمين، بطول 221 كم، ده غير أن المدينة فيها كورنيش حضاري بطول الشاطئ، بالإضافة لـ مركز مؤتمرات عالمي مجهز لاستقبال مؤتمرات أوروبا.
العملين الجديدة، الرئيس السيسي استلمها صحراء وحقول ألغام، لكن مع العمل ليل ونهار لمدة 5 سنوات، اتحولت واحدة من المدن الحديثة والفريدة، اللي ملهاش مثيل في المنطقة كلها، وده اللي زود فرص الاستثمارات الضخمة في الساحل الشمالي زي مدينة راس الحكمة.
