بعيدا عن تحويلات المصريين فى الخارج.. إيه هي مصادر زيادة الاحتياطي النقدي في مصر
يا ترى إيه اللي بيحصل لاحتياطي النقد الأجنبي الأيام دي، وليه الرقم عمال يزيد وبقى فوق ال48 مليار دولار؟ وهل ده بسبب تحويلات المصريين بس ولا فيه حاجات تانية بتدعم الجنيه؟..
في الفترة الأخيرة، البنك المركزي أعلن إن صافي الاحتياطي من العملات الأجنبية وصل ل 48.14 مليار دولار بنهاية أبريل 2025، والرقم ده مجاش من فراغ، لأ ده فيه شغل جامد من مصادر مختلفة.
يعني مثلا، تحويلات المصريين العاملين بالخارج، اللي ضربت أرقام قياسية ووصلت ل 29.4 مليار دولار في أول 10 شهور من السنة المالية الجديدة، يعني زادت حوالي 77% عن نفس الفترة من السنة اللي فاتت، وده وفر سيولة دولارية قوية خلت الاحتياطي يزيد.
عندك كمان السياحة، ودي من المصادر الكبيرة أوي للدخل بالدولار، فيعني مثلا في الفترة الأخيرة السياحة بدأت ترجع لسابق عهدها وبأرقام أحسن بكتير، خاصة بعد استقرار الأوضاع الأمنية وتشجيع السياحة الشاطئية والثقافية، وده خلا دخل السياحة يزيد ويوفر مليارات من العملة الصعبة دخلت خزينة الدولة ورفعت معاها الاحتياطي.
كمان، السياحة العلاجية والدينية عليها إقبال كبير دوقتي خاصة في فصل الصيف، وده بيخلي السياح يصرفوا بالدولار واليورو والإسترليني، وكمان فيه تسهيلات في التأشيرات ومشروعات ضخمة زي المتحف المصري الكبير والمدن السياحية الجديدة، ودي حاجات بتجذب سائحين من كل حتة وبترفع الإيرادات السياحية وتدعم الاحتياطي.
ولو ماتعرفش، فالسياحة كمان بتوفر فرص عمل للمصريين، وده بيزود من القوة الشرائية وبيحرك عجلة الاقتصاد، وده كله بيخلي البلد أقدر على مواجهة أى أزمات وبيخلي قيمة الجنيه أقوى.
نيجي بقى للاستثمارات الأجنبية، فهي كمان لعبت دور كبير أوي، عندك مثلا في آخر فترة شوفنا صفقات ضخمة، سواء في البترول والغاز أو حتى المشروعات الصناعية والعقارية، وده دخل للبلد فلوس بالدولار على طول، عشان كده المستثمرين شايفين إن الاقتصاد بيتحسن، فبدأوا يدخوا استثمارات من العيار التقيل، ودي بتعزز الاحتياطي النقدي.
غير كل كده، مصر بقت وجهة مميزة لشركات عالمية كبيرة بسبب الموقع الجغرافي والاستقرار النسبي وتنوع الاقتصاد، وده شجع مستثمرين أجانب على ضخ أموالهم، فزاد المعروض من الدولار، وكمان الحكومة قدمت تسهيلات كتير لجذب الاستثمارات زي الإعفاءات الضريبية وتبسيط الإجراءات، فكل ده بيدعم الاحتياطي.
ونقدر نقول إن الاستثمارات دي بتساعد على تقليل العجز التجاري وزيادة الصادرات على المدى البعيد، وده بيخلي عندنا دايما مورد مستدام من العملة الأجنبية وبيرسخ قوة الجنيه وكمان بيقوي موقفه قدام الدولار.
وفي النهاية، نقدر نقول إن الموضوع مش بس تحويلات مصريين الخارج، لأ ده مجموعة عوامل زي السياحة والاستثمارات الأجنبية وحتى قناة السويس وصادراتنا، فكل ده بيرسم صورة إيجابية للاقتصاد المصري وبيثبت إن الطريق اللي إحنا ماشيين فيه صح، بس طبعا محتاجين نكمل بنفس القوة ونركز على الاستقرار والإنتاج عشان الاحتياطي يزيد أكتر وأكتر.
