الدولار سعره هينزل لـ 45 جنيه.. توقعات متفائلة بعودة زمن الجنيه في نهاية 2025
ليه فيه توقعات قوية في الأيام الأخيرة بهبوط ضخم فى سعر الدولار؟ وايه المتغيرات اللى هتحصل هتعيد للجنيه بريقه المفقود؟ وايه دور الصين اللى ممكن يغير قواعد اللعب؟
فاااصل كتير من الخبراء بقوا بيتوقعوا إن الدولار هيوصل لـ 45 جنيه مع نهاية السنة دي .. رقم ممكن يبان غريب ومستحيل لكتير مننا دلوقتي .. لكن لو بصينا حوالينا كويس هنلاقي فيه دلائل كتير بتأكد التوقع ده.
محرم هلال .. رئيس الاتحاد المصري لجمعيات ومؤسسات المستثمرين.. قال فى تصريحات صحفية مؤخرا ان الدولار هينزل لـ 45 جنيه بنهاية السنة .. وأكد ان ده مش مجرد كلام مرسل.. لأ.. ده كلام مبني على حقائق ومتغيرات قوية جداً بتحصل على الأرض.
إيه هي بقى المتغيرات دي؟
هلال كشف عن 4 مشاريع عملاقة هتغير شكل الاقتصاد المصري تماماً وهتدعم الجنيه بشكل غير مسبوق .. أولهم وأضخمهم .. مشروع رأس الحكمة اللي كلنا عارفينه .. واللي جاب لمصر 24 مليار دولار استثمار مباشر .. غير تحويل 11 مليار دولار من الودائع الإماراتية لاستثمارات .. ده لوحده كفيل يغير المعادلة..
تاني حاجة .. مشروع قطري ضخم هيتعمل في الساحل الشمالي الشهر الجاي بقيمة 3.5 مليار دولار .. وده اللي كشفته بلومبرج .. يعني مش مجرد كلام .. لأ .. دي تحركات فعلية على الأرض..
وتالت مشروع .. وهو المفاجأة الأكبر .. مشروع صيني ضخم جداً في الساحل الشمالي برضه جنب رأس الحكمة .. تفاصيله لسه ما اتعلنتش كلها .. لكن مجرد وجود الصين بحجم استثماراتها الضخمة دي .. بيخلينا نفكر في نقلة نوعية وجذرية في الاقتصاد المصري
ورابع مشروع .. مشروع خليجي كبير في رأس شقير .. المنطقة اللي أصدر الرئيس السيسي قرار بنقل جزء كبير منها لوزارة المالية.. عشان يتم إصدار صكوك مدعومة بالأرض .. ودي خطوة مهمة جداً لخفض الدين العام وتوفير تمويل للموازنة بشروط كويسة.
كل المشاريع دي مع بعضها .. بتعمل سيولة دولارية غير عادية في السوق المصري .. وده طبعاً بيقلل الطلب على الدولار .. وبالتالي بيقل سعره.
ونيجي بقى لدور الصين .. ليه هي بالذات ممكن تغير قواعد اللعبة كلها؟
هلال توقع نقل مصانع ضخمة من الصين لمصر الفترة اللي جاية .. وده بسبب الرسوم الجمركية اللي فرضتها إدارة الرئيس الأمريكي دونالد ترامب على الدول اللي بتصدر لأمريكا.
مصر دلوقتي بقت وجهة مفضلة للاستثمارات الصينية اللي عايزة تصدر للسوق الأمريكي الضخم .. لأن الرسوم الجمركية على مصر أقل .. فده بيدينا ميزة تنافسية قوية جداً .. تخيل كم المصانع الصينية اللي ممكن تيجي مصر .. ده معناه فرص عمل .. وصادرات أكتر .. وعملة صعبة تدخل البلد بشكل مستمر .. وده اللي هيخلي الجنيه يقوى ويرجع تاني لوضعه الطبيعي.
مش بس المشاريع دي .. لأ .. فيه كمان دعم دولي كبير بيصب في مصلحة الجنيه ..البرلمان الأوروبي وافق على تقديم حزمة مساعدات مالية لمصر بقيمة 4 مليارات يورو .. وده مبلغ كبير هيعزز من احتياطي العملة الصعبة عندنا ..غير كمان الشريحة الخامسة من قرض صندوق النقد الدولي بقيمة 1.2 مليار دولار .. اللي متوقع صرفها بداية السنة المالية الحالية.
كل ده .. مع الزخم الاستثماري اللي مصر بتشهده من دول زي تركيا ودول أوروبا الشرقية .. وتلقي مصر لعشرات الاستفسارات يومياً من مستثمرين أجانب عايزين يعملوا مشاريع جديدة .. وكل ده بيخلي الصورة أوضح .. ومستقبل الجنيه المصري أحسن بكتير.
كل العوامل دي .. الاستثمارات الخليجية والصينية الضخمة .. الدعم الأوروبي .. تحويل الاستفسارات دي لاستثمارات فعلية .. كل ده هيزود وفرة العملة الأجنبية .. وهيدفع الدولار إنه ينزل لمستوى الـ 45 جنيه .. وتحدى الجميع بالتوقع ده مع نهاية السنة.
