"الملاذ الآمن".. شوف اللي بيحصل لأسعار الفضة.. هل هتسحب البساط من الدهب؟
يا ترى إيه اللي بيحصل لأسعار الفضة، رايحة على فين دلوقتي، وليه الناس بدأت تركز على المعدن الرمادي مؤخرًا، وهل الإقبال على الفضة ده ممكن يكون بداية رحلة صعود جديدة أو تقدر تسحب البساط من الدهب؟
من فترة كده، الفضة بتثبت إنها مش بس معدن للزينة، لأ ده كمان بقت استثمار مضمون وملاذ آمن زي الدهب بالضبط، والحقيقة إن أسعارها في الفترة الأخيرة سجلت أرقام تخض، لدرجة إنها لامست مستويات قياسية عند 36.78 دولار للأوقية، وده بسبب الطلب العالمي الكبير عليها خاصة من قطاعات زي الطاقة والعربيات والمجالات الإلكترونيات.
أما بقى عندنا في مصر، فالفضة عاملة شغل عالي اليومين دول، ووصل سعر الجرام من عيار 800 وصل ل 51.25 جنيه، وعيار 925 سجل 59.25، وكمان عيار 999 سجل 64 جنيه للجرام. ده غير إن الجنيه الفضة "عيار 925" بقى بحوالي 474 جنيه، وطبعا الأرقام دي بتأكد إن الفضة استثمار آمن ومكسبه عالي.
ولكن التوترات الجيوسياسية اللي دايما بتأثر على الأسواق، مأثرتش على الفضة، لأنها فضلت محتفظة بقوتها، وبالفعل مكاسبها جذبت المستثمرين لها.
عشان كده، الطلب العالمي على الفضة لسه عالي شويتين، وده مش من فراغ، لأن الأرقام بتقول إن أكتر من 80% من استخداماتها بتيجي من صناعات تقيلة زي الإلكترونيات والطاقة، ودي حاجات ما بتقفش أبدا حتى وقت الأزمات.
فوق كل ده، الفضة ارتفعت من أول السنة لحد النهاردة حوالي 25%، وده بيأكد إن المعدن الرمادي لسه على قمة المكاسب، والتوقعات بتقول أنها ممكن توصل ل 40 دولار في خلال سنة، ومش بعيد تكسر ال 46 دولار كمان على منتصف 2025.
أما بقى لو جيت قارنت الدهب بالفضة، فهتلاقي إن الفضة لسه مقيمة أقل من سعرها الحقيقي، وفرص صعودها لسة كبيرة بالمقارنة بأي حاجة تانية.
ونقدر نقولك إنك لو عايز تستثمر فلوسك على المدى البعيد، فالفضة ممكن تكون اختيار مناسب أوي ليك، فحاول تستثمر على مراحل، وراقب الأسعار والتوترات السياسية، وخليك دايما فاكر إن المعادن الثمينة دايما بتحافظ على قيمتها وقت الأزمات.
وطبعا، الاستثمار في الدهب مختلف تماما عن الاستثمار في الفضة، فكل مستثمر بيختار الوعاء الادخاري الأفضل ليه، ولكن لو أنت معاك مبلغ معتدل مش كبير أوي، وعايز حاجة تحفظ فلوسك وفي نفس الوقت تزودها، فمفيش قدامك غير الفضة، استثمار آمن وغير مكلف وحصان رابح دايما مش بيخسر.
