مكاسب مصر من الحرب في المنطقة.. رب ضارة نافعة
هي مصر ممكن تستفاد من الأزمة العالمية اللي في المنطقة.. وازاي ممكن اللي حصل دا يكون فرصة في تحول اقتصادي كبير في مصر .. وايه الفرصة اللي جت على طبق من دهب للأسواق المصرية..
طبعا المشهد في المنطقة مش محتاج تعليق.. الحرب مستمرة.. وكل يوم بتزيد سخونتها ودا بينعكس في لحظتها على الأسواق العالمية المختلفة من نفط وغاز ودهب وعملات وسلع وخدمات لأن العالم كله مرتبط اقتصاديا بشبكة واحدة واللي بيحصل في الصين بيسمع في الولايات المتحدة ولو زلزال ضرب اليابان توابعه الاقتصادية بتوصل المكسيك وهكذا.. وفي مصر شفنا ازاي الدولار والذهب زادود في اليومين اللي فاتوا ودا طبيعي لكن في نفس الوقت خطر وضغط اكتر على الأسواق المصرية..
الحقيقة اللي بيحصل مع الاقتصاد المصري حاجة غريبة جدا كل ما يطلع من أزمة ويبدأ يتعافي تحصل ازمة أكبر ولو فاكرين الاقتصاد في مصر اتعرض لهزات قوية وكلها خارجة عن الإرادة بداية من أزمة كورونا اللي ضربت العالم وشلت الأسواق مروا بالأزمة الروسية الأوكرانية وبعدها احداث الشرق الأوسط واللي بدأت في غزة وانتهت بإيران وفي كل مرة كانت الدولة بتاخد وقت عشان تسترد قوتها وتصلح اللي حصل.. وزي ما حصل في الأزمات اللي فاتت مصر هتقدر تعدي من الأزمة الحالية والحكومة أعلنت خطط كتير لمواجهة آثار الهزات الاقتصادية في العالم والمنطقة.
طيب ازاي مصر ممكن تستغل اللي بيحصل ؟
رغم مشاهد الصراع والخراب اللي حولينا والاضطراب اللي في الأسواق العالمية وتأثر مصر مباشرة بيها خاصه في إيرادات قناة السويس والسياحة لكن عندها فرص كبيرة جدا إنها تستغل الوضع الحالي في الترويج لنفسها اكتر أنها بلد مستقر وآمن للاستثمار الأجنبي والعربي في المنطقة.. والأحداث أكدت أن مصر دولة مركزية وقوية وقادرة على التعامل مع اصعب الظروف وأنها ملاذ آمن لرؤوس الأموال ودا اللي حصل في الأزمات اللي فاتت.
النهاردة مصر في صدارة الأسواق المربحة في عالم الاستثمار ودا بفضل موقعها الجغرافي والبنية الأساسية اللي بتملكها وسهولة وصولها لكل الأسواق العالمية وعشان كمان خطوط التجارة اللي بتتحكم فيها ودا بيدي أمان للمستثمرين أنهم يقدر يستثمرو في مصر بكل أمان واطمئنان وفي نفس الوقت هيحققوا أرباح كبيرة بسبب التسهيلات اللي بتمنحها الدولة للمستثمرين زي الرخصة الدهبية وكمان الاستفادة من الصعود الكبير في مؤشرات الاقتصاد المصري واللي بتقول إن مصر هتكون مركز صناعة المنطقة ومركز سياحي عالمي وهتكون رقم مهم جدا في صناعة التعهيد والنقل البحري واللوجستيات. وكمان بقت موطن مهم للشركات العالمية في كل المجالات واللي بتدور على مكان مستقر في المنطقة عشان تنطلق منه.
باختصار مصر هتكون مستقبل المنطقة الاقتصادي والمستثمرين عارفين دا كويس جدا وعشان كده هيكون فيه هجوم استثماري ضخم على مصر الايام الجاية ودا لأن الاستثمارات هتهرب من دول الصراع وهتروح مناطق آمنة ودول قوية عسكريا ومستقرة سياسيا وعندها مزايا اقتصادية واستثمارية مش موجوده في أي بلد إلا في مصر.
