صدمة جديدة للمواطنين بعد انتهاء اجازة عيد الأضحى بسبب أسعار شرائح الكهرباء
مع نهاية شهر يونيو الحالي هتكون في صدمة جديدة للمواطنين والصدمة دي هتكون بسبب اسعار شرائح الكهرباء.. ياتري اية اللي هيحصل في اسعار شرائح الكهرباء.. وليه الحكومة هتصدم المواطنين فيها.. وهل هتكون في زيادات جديدة في الأسعار.
من كام يوم طلعت اخبار ان الحكومة بتدرس تاجيل اقرار زيادات جديدة في اسعار شرائح الكهرباء خصوصا بعد ما الدولة رفعت الدعم المخصص للكهرباء في الموازنة الجديدة للدولة لـ75 مليار جنية، والزيادات اللي حصلت في الموازنة هتغطي المبالغ المطلوبة لاستيراد وشراء شحنات الغاز اللازمة لتشغيل محطات توليد الكهرباء، وبالتالي كان الأتجاه أن الحكومة تقر تأجيل تطبيق اي زيادات جديدة في اسعار شرائح الكهرباء لحد بداية 2026 علي الاقل.
طيب اسعار شرائح الكهرباء الحالية هتنتهي امتي وبتوصل لكام حاليا؟.
خطة تسعير شرائح الكهرباء واللي الحكومة شغالة بيها من شهر اغسطس اللي فات هتنتهي مع نهاية السنة المالية الحالية واللي بتنتهي كل سنة في شهر يوينو وبتبدا السنة المالية الجديدة مع بداية شهر يوليو من كل سنة، وبالتالي كل اسعار شرائح الكهرباء الحالية هينتهي العمل بيها مع نهاية شهر يونيو الحالي.
من كام يوم الدكتور مصطفي مدبولي رئيس مجلس الوزراء طلع في مؤتمر صحفي بعد اجتماع الحكومة الأسبوعي وقال أن الحكومة بتنزود اسعار شرائح الكهرباء كل سنة بسبب الزيادات الطبيعةي في تكلفة الأنتاج، وتكلفة الانتاج يقصد بيها هنا هيا المواد البترولية من غاز طبيعي ومازوت وسولار واللي الدولة بتحتاجه علشان تشغل محطات توليد الكهرباء، ده غير الزيادات اللي بتحصل في تكلفة المواد اللي بتدخل في التشغيل زي المحولات ومحطات نقل الكهرباء، وقطع الغيار اللي بتدخل في التشغيل.
بعد كلام رئيس مجلس الوزراء عن اسعار شرائح الكهرباء متوقع أنه يحصل توجيه من الحكوم لوزارة الكهرباء والطاقة المتجددة وتحديدا جهاز تنظيم مرفق الكهرباء وحماية المستهلك لدراسة تطبيق الزيادات الجديدة في الأسعار، وجهاز تنظيم مرفق الكهرباء بيبدأ يعمل دراسته علشان يقر معدل الزيادات الجديدة في الاسعار ومش هتكون مش هتتعدي 4%، خصوصا أن أسعار الصرف في مصر بتنخفض وبالتالي الزيادات الجديدة مش هتكون كبيرة زي ما حصل الفترة اللي فاتت .
