مهما سعره زاد اشتري دهب.. هنقولك ليه في التقرير ده
ليه بنقولك متخافش من الدهب واشتري وأنت مغمض مهما سعره زاد وغلي.. وليه الدهب هيفضل الاستثمار المضمون رغم ارتفاع الأسعار بشكل غير مسبوق..
كلنا شفنا اللي بيحصل في سوق الدهب والاسعار اللي كل يوم بتطلع بسبب التوترات الجيوسياسية في العالم والاضطرابات في الأسواق العالمية بسبب الصراع بين الولايات المتحدة والصين وغيرها من الدول بسبب قرارات ترامب الفجائية والصادمة للكتير من الدول.. ورغم إن التوترات دي هي اللي رفعت الدهب لكن في نفس الوقت هي نفس الأسباب اللي عشانها هتشتري دهب وتخزنه وتستثمر فيه لأن طول ما فيه أزمات كل ما سعر الدهب بيزيد على طول.
طيب التوقعات بتقول إيه في سوق الدهب؟
زي ما قلنا لحضراتكم الدهب استثمار الأزمات والاضطرابات يعني سعره بيعلي في وقت الكوارث ايا كانت (حروب اقتصادية أو حروب عسكرية أو كارثة طبيعية أو انهيارات في أسواق المال والاعمال ) لأن الدهب هنا بيكون الملاذ الآمن للدول والبنوك المركزية العالمية والشركات والافراد لأنه الاستثمار الأهم اللي بيحفظ قيمة الأموال من الضياع ..
وكل التوقعات بتقول إن الدهب هيفضل يزيد ويرفع لغاية ما تنتهي الأزمات الاقتصادية في العالم ولأن التوقعات بتقول إننا قدام صراع طويل بين واشنطن وبكين وفي نفس الوقت الأزمات العسكرية والسياسية بتزيد في العالم فدا معناه إن الدهب هيفضل يرفع لغاية أواخر 2026 حسب التوقعات واللي منها أن الدهب هيزيد من 4 إلى 6 آلاف دولار للأوقية.
ولأن الصاغة المصرية مرتبطة بالاسعار والأسواق العالمية فدا معناه إن سعره هيقفز لمستويات قياسية في الأيام والشهور الجاية وبالتالي المنطق بيقول إن الاستثمار في الدهب دلوقتي مثالي جدا وهيكون مربح على المدى القصير والطويل وهيفضل تمنه فيه وعشان كده خبراء الصاغة بينصحوا المواطنين باستمرار الاستثمار في الدهب وتخزينه للأيام الجاية لأن التوقعات صعبة وخطيرة.. كمان يفضل شراء سبايك وحنيهات دهب بدل من المشغولات الذهبية لأن السبايك بتحتفظ بكامل قيمتها ومش بيتخصم منها مصنعية وكمان تجار الدهب بينصحوا اي حد معاه دهب مايتسرعش ويبيعه دلوقتي عشان الأسعار لسه هتزيد وبالتالي المكسب هيزيد.
طيب تجار الدهب بيحذروا من إيه دلوقتي ؟
اكتر حاجة تجار الدهب بيحذروا منها دلوقتي هو عمليات الغش واللي زادت بعد ارتفاع الأسعار بشكل قياسي في الصاغة ولجوء بعض التجار معدومي الضمير لغش المشغولات عن طريق إضافة نحاس ليها وعشان كده لازم نشتري من تاجر موثوق فيه ويكون معاك حد خبرة في الدهب عشان يعرف السليم من المضروب.
