تطوير ولا بيع.. الحكومة هتعمل إيه في أملاك وأصول الأوقاف
ايه سر الحملة على الحكومة في الساعات الأخيرة..وهل فعلا مدبولي عاوز يبيع أصول هيئة الأوقاف.. وايه اللي هيحصل في اصول تمنها مليارات الجنيهات.
كلنا متابعين الحملة اللي أطلقتها منصات معروف توجهاتها المعادية للدولة وروجت إن الحكومة ناوية تستولي على أملاك هيئة الأوقاف المصرية التابعة لوزارة الأوقاف وأنها هتبيعها للأجانب والعرب وللاسف فيه ناس صدقت.. لكن الحقيقة وضحها الدكتور مصطفى مدبول، رئيس مجلس الوزراء واللي أكد إن الحكومة مش هتبيع أصول هيئة الأوقاف لكن قررت إل تعظيم العائد منها ودا عن طريق الدخول في شراكات استراتيجية مع القطاع الخاص.. وقال مدبولي إن الهدف من الشراكات دي هو الاستغلال الأمثل لاصول الأوقاف بما يساهم في دعم الاقتصاد الوطني وتحقيق التنمية المستدامة، مع الحفاظ الكامل على ملكية الدولة لها.
مدبولي زاد في كلامه ووضح بمنتهى الشفافية أن التوجه الجديد جزء من خطة أشمل لتعظيم الاستفادة من أصول الدولة غير المستغلة وقال إن جميع الإجراءات المتخذة بتم وفق إطار قانوني وشفاف يراعي البعد الاجتماعي والشرعي لأصول الوقف.. يعني باختصار أصول وأملاك هيئة الأوقاف بتكون ليها طبيعة خاصة لأن أصحابها أو ملاكها الأصليين اتبرعوا بيها واوقوفوها للصالح العام ودي الغاية منها .. لكن بمرور السنين الأصول دي تم إهمالها وفي كتير منها بيجيب ملاليم لانه محصلش فيه تطوير أو تنمية أو إعادة تأهيل والأصول دي ممكن تكون اراضي أو وحدات ادارية وسكنية .
وبالارقام إيرادات هيئة الأوقاف بتوصل ل3 مليار جنيه سنويا في وقت حجم الأصول دي بيعدي الترليون جنيه لأن الهيئة عندها اصول كتير جدا وفي كل محافظات مصر وكتير منها في مناطق مميزة تجاريا في القاهره الكبرى أو عواصم المحافظات.. وبمقارنة الإيرادات بحجم الأصول هنلاقي المبلغ قليل جدا وممكن الإيرادات توصل لارقام أكبر من كده بكتير ودا اللي الحكومة عاوزة تعمله أنها تطور الأصول دي وتحقق عاىد أكبر للهيئة عشان تنفقها في مصارفها الشرعية اللي هي بتخدم البلد كلها مش فئات محتاجه بس والقطاع الخاص هو اللي هيطور ويدفع طبعا مقابل نسبة معينة من الإيرادات أو حسب الاتفاق مع الحكومة..
يعني مفيش حاجه اسمها بيع اصول هيئة الأوقاف ولا أي كلام من دا ولو الحكومة عاوزة تبيع اصول الأوقاف كانت طرحتها في برنامج الطروحات الحكومية لكن عشان الوضع القانوني والشرعي الخاص بالأصول دي الدولة قررت تطورها لاول مرة من سنين عشان تحقق أكبر عاىد منها وبدل ما تجيب 3 مليار جنيه تجيب 300 مليار جنيه ودا وارد جدا لأن زي ما قلنا الأوقاف عندها كنوز عقارية وأراضي في أماكن مميزة وتغير التفكير في استغلالها هيجيب موارد ضخمة وكله هيستفاد وبالعكس تطوير اصول الأوقاف هيحافظ عليها من النهب والسرقة والاحتيال.
