الدهب يتراجع في مصر وسط تقلبات الدولار.. فرصة استثمار ولا بداية انهيار؟
يا ترى إيه سر تراجع أسعار الدهب دلوقتي خاصة في ظل تقلبات الدولار، هل بسبب السعر العالمي ولا ضعف الطلب عليه، وهل نقدر نقول إن دي فرصة للاستثمار ولا بداية لانهيار الأسعار، والمستثمرين في المعدن الأصفر يعملوا إيه؟
طبعا، المستثمرين دلوقتي في حالة ترقب، هل تراجع أسعار الذهب في مصر مجرد هبوط مؤقت؟ ولا بداية اتجاه جديد هيأثر على قرارك كمستثمر؟، خاصة بعد اليومين اللي فاتوا، لأن أسعار الدهب في مصر انخفضت بحوالي 70 جنيه للجرام، وسعر جرام الذهب عيار 21 وصل ل 4610 جنيه بعد ما كان 4710، وده انعكاس مباشر لتراجع سعر الأوقية عالميا من 3358 ل 3291 دولار.
لكن ليه ده بيحصل؟
ببساطة، لأن الدولار الأمريكي ارتفع، والطلب على الملاذات الآمنة زي الدهب قل، وكمان السوق بقى متفائل نسبياً بتحسن مؤشرات الاقتصاد الأمريكي، والمستثمرين بدأوا يرجعوا للأسهم.
وهنا قال المدير التنفيذي لمنصة تداول الذهب "جولدن بيليون"، إن العلاقة بين الدهب والدولار عكسية، لما الدولار بيقوى الدهب بيضعف، وده لأن المعدن الأصفر بيتسعر بالدولار، ولما العملة الخضرا ترتفع، الدهب ببيبقى أغلى للمستثمرين الأجانب.
لكن السؤال المهم هنا، هل ده وقت تشتري فيه دهب ولا تستنى؟
الإجابة مش واحدة لكل الناس، لو أنت مثلا مستثمر طويل الأجل، وبتدور على تحوط ضد التضخم أو عدم الاستقرار، فالأسعار الحالية مغرية، لكن لو أنت مضارب على المدى القصير فممكن تستنى تشوف بيانات الفيدرالي الأمريكي يوم الأربعا الجاي، ومؤشر التضخم الأساسي يوم الجمعة.
الخلاصة هي إن الدهب دلوقتي في فترة تقلب، بس دا مش معناه إنه فقد قيمته كاستثمار آمن، لأن السوق دايما بيروح وييجي، والمستثمر الشاطر هو اللي يعرف إمتى يدخل وإمتى يخرج.
وقبل ما تشتري، لازم تسأل نفسك، انت بتشتري علشان استثمار طويل المدى؟ ولا عايز تبيعه قريب؟ ده هيفرق في نوع الدهب اللي تشتريه.
كمان، لو هدفك استثمار، الأفضل تشتري سبايك دهب أو الجنيهات، زي جنيه الملك فؤاد أو عبد الناصر، لأن مصنعتهم أقل من المشغول، وخلي بالك من المصنعية، فحاول تقللها على قد ما تقدر.
برضو، لازم تختار مكان معروف وموثوق، وخد فاتورة بكل حاجة فيها الوزن والسعر والعيار، وماتنساش تتابع سعر الدهب باستمرار وشوف السعر وقت ما تنوي تشتري أو تبيع.
وأخيرا، لو اشتريت دهب عليه شغل زي المجوهرات، حاول تحتفظ بالفاتورة والعلبة، عشات ده بيساعد وقت البيع، وأخيرا متشتريش وقت الأسعار العالية قوي.
