انفراجة منتظرة في موارد مصر الدولارية.. تحركات حكومية مهمة في أخطر ملفين
كل المؤشرات بتقول أن الجنية المصري هيكون السنة في أفضل مواسمه.. ياتري اية الطرق اللي الحكومة بتعتمد عليها لبناء الاقتصاد المصري.. وامتي سعر صرف الجنيه هيرتفع بالبنوك.
الفترة الرئاسية الجديدة للرئيس عبدالفتاح السيسي الحكومة شغالة علي برنامج اقتصادي كبيرة هدفه الاساسي النهوض بالاقتصاد المصري وفتح عدد كبير من الأبواب كمصادر رئيسية للعملات الأجنبية من الخارج وزيادة ايرادات الناتج القومي، خصوصا أن المصادر القديمة والمعرفة للدخل الدولاري لمصر من الخارج في الوقت الحالي بتعاني من نقص شديد في ايرادتها بسبب التوترات والتغيرات الجيوسياسية اللي بتحصل في العالم وتحديدا في منطقة الشرق الأوسط.
التكليفات الرئاسية اللي صدرت من الرئيس عبدالفتاح السيسي للحكومة بتتخلص في وضع برنامج اقتصادي مرن قادر علي التعامل مع كل التحديات والصدمات، ويكون بيعتمد علي عدد كبير من مصادر الدخل الدولاري لمصر من الخارج، وده اللي بدأت الحكومة تحققه علي أرض الواقع والبداية كانت من قطاع الصناعة واللي الحكومة شغاله عليها بكل قوة، وقدمت تحفيزات وتسهيلات كبيرة جدا لاصحاب رؤوس الأموال الأجنبية للدخول للسوق المصري، والتسهيلات دي كانت عبارة عن تسهيلات في الحصول علي الاراضي اللازمة لبناء المشروعات والمصانع، ده غير التسهيلات اللي قدمتها الحكومة للحصول علي تراخيص البناء والتشغيل واللي الحكومة حددتها في الوقت الحالي في صورة موافقة واحدة بس اسمها الرخصة الذهبية واللي الحكومة بتقدمها للمستثمرين واللي بتكون كافية للبناء والتشغيل بدون الحاجة لاي موافقات تانية من اي جهة أو إدارة في الدولة .
الخطة الحكومية للنهوض بقطاع الصناعة في مصر بتستهدف تحويل مصر لمركز اقليمي للتبادل التجاري، وده قايمة علي وجود انواع كتيرة من الصناعات المختلفة في السوق المصري لتغطية الطلب المحلي والتصدير للخارج خصوصا أن مصر في الوقت الحالي بتستهدف الوصول بالصادرات المصرية لـ140 مليار دولار في 2030.
تاني باب الحكومة شغاله عليه حاليا لزيادة الايرادات الدولارية وبالتالي الجنية المصري هيسترجع منه قوته هو قطاع السياحة واللي الحكومة بتستهدف الوصول لتحقيق 30 مليون سائح وتحقيق 30 مليار دولار كايرادات من القطاع في 2028، وفي الوقت الحالي الحكومة بتعمل معجزة في القطاع لاستهداف وجذب انتباه الوفود السياحية في كل الاسواق السياحية المستهدفة حوالين العالم للنزول لمصر وقضاء الاجازات، وأول المعجزات اللي بتعملها الحكومة لزيادة أعداد السائحين الوافدين لمصر هو الافتتاح المرتقب للمتحف المصري الكبير واللي هيكون يوم 3 يوليو اللي جاي واللي هيكون بحضور عدد كبير من قادة وملوك ورؤساء جمهوريات ورؤساء حكومات عدد كبير من دول العالم، وهيكون حفل الافتتاح مستمر ومكمل لأكثر من 4 أيام، وهيكون في تغطية اعلامية من اكبر القنوات والوسائل الإعلامية في عدد كبير من دول العالم، وده بهدف الترويج للمتحف والقطع الأثرية الموجودة فيه بهدف زيادة الوفود السياحية الوافدة لمصر .
