تراجع الذهب رغم ضعف الدولار.. شوف السر ورا المفاجأة دي
يا ترى إيه اللي خلى أسعار الهب ترجع تاني للورا، وإزاي الدولار الضعيف ماقدرش يشيل الدهب لفوق، وإيه هو مستقبل المعدن الأصفر في الفترة الجاية، والأسعار رايحة على فين؟
من كام يوم، أسعار الذهب في السوق المحلي عندنا في مصر نزلت حوالي ٤٥ جنيه، وده بعد ما الأوقية في البورصة العالمية نزلت كمان ٢٨ دولار، وسعر جرام ٢١ بقى حوالى ٤٦٦٥ جنيه، بعد ما كان في آخر الأسبوع اللي فات بيوصل ل ٤٧١٠ جنيه.
طب إيه اللي حصل؟ وليه الانخفاض ده؟
السر المره دي مش في سعر الدولار بس، لأ ده في عوامل كتير لعبت دور كبير، أولهم إن الطلب على الدهب بدأ يقل، وده لأن المخاوف من الحروب التجارية بدأت تهدى شوية، وده خلل ناس كتير تخرج من استثمار الدهب كملاذ آمن.
عشان كده، قال سعيد إمبابي، المدير التنفيذي لمنصة آي صاغة، إن التراجع ده سببه إن الناس بدأت تتراجع عن شراء الدهب، وده راجع لأسعاره اللي عليت بشكل كبير بسبب تراجع الجنيه المصري قدام الدولار، وكمان بسبب عدم استقرار الوضع الاقتصادي، يعني ببساطة، الأسعار كانت بترتفع والناس مش قادرة تشتري، فالطلب قل.. ولما الطلب يقل، السعر بينزل.
طب إيه اللي بيحصل بره؟
على المستوى العالمي، الرئيس الأمريكي دونالد ترامب قرر يأجل فرض رسوم جمركية جديدة على واردات الاتحاد الأوروبي، وده خفف التوترات الاقتصادية العالمية، وبالتالي خلا الناس ما تبقاش محتاجة تشتري دهب كأمان.
بس في نفس الوقت، فيه حاجات تانية بتخلي الناس مترددة، زي عجز الموازنة الفيدرالية في أمريكا اللي متوقع يوصل ٤ تريليون دولار في ال ١٠ سنين الجاية، وده بيخلي الدولار ضعيف، واللي المفروض يزق الدهب لفوق، بس برضه الذهب نازل؟!
لأن السوق في حالة انتظار، والناس مستنية محضر اجتماع الفيدرالي الأمريكي اللي هيطلع قريب، واللي ممكن يوضح إذا كان فيه نية لتخفيض أسعار الفائدة الفترة الجاية، ولا لأ، ولو حصل تخفيض، ده ممكن يشجع الناس ترجع تاني تشتري دهب.
كمان، التوترات الجيوسياسية لسه موجودة، يعني صراعات في أوروبا ومشاكل في الشرق الأوسط، زكلها حاجات بتخلي المستثمرين يبصوا تاني على الدهب والفضة كأصول آمنة.
يعني إيه المتوقع؟
ببساطة، التوقعات متضاربة، على المدى القصير ممكن الأسعار تفضل تتحرك فوق وتحت، بسبب حالة الترقب، بس على المدى الأطول، لو حصل أي تصعيد عالمي، أو لو الفيدرالي قرر يخفض الفايدة، ممكن نشوف الدهب يرجع يطلع تاني.
والخلاسة هي إن الدهب نزل دلوقتي علشان الطلب قل شوية، زالدولار ضعيف لكن مش كفاية لوحده لرفع أسعار المعدن الأصفر، وكمان المستثمرين مترددين ومستنيين وضوح في قرارات الفيدرالي.
عندك كمان، التوترات العالمية لسه موجودة، وممكن في أي لحظة ترجع الذهب فوق تاني، يعني لو بتفكر تشتري تابع السوق كويس، وخلي قرارك مبني على تحركات الفايدة والدولار، مش السعر بس.
