الأسعار بتزيد بشكل مرعب.. كواليس الليالي الصعبة في سوق الدهب
إيه اللي بيحصل في سوق الذهب اليومين دول؟ وليه الأسعار قفزت قفزة كبيرة في الساعات الأخيرة؟ وايه علاقة الرئيس الأمريكي دونالد ترامب بالجنون ده اللى بيحصل فى سوق الدهب؟
أسعار الذهب في مصر وصلت لمستويات غير مسبوقة.. سعر جرام الذهب عيار 24.. اللي هو الأنقى.. سجل حوالي 5377 جنيه للبيع 5354 جنيه للشراء.. أما عيار 21.. اللي هو الأكتر تداول في مصر.. وصل لـ4705 جنيه للبيع و4685 جنيه للشراء.. وعلى المستوى العالمي.. أونصة الذهب وصلت لـ3359 دولار تقريباً.. وده رقم يعكس الزوبعة اللي بتحصل في الأسواق.
طيب إيه اللي خلّى الذهب يقفز كده؟
الدهب دايماً بيبقى الملاذ الآمن لما الأسواق بتترنح.. لما بتحصل أزمات اقتصادية أو توترات جيوسياسية.. المستثمرين بيجروا على الدهب عشان يحافظوا على فلوسهم.. في الفترة الأخيرة.. الرئيس الأمريكي دونالد ترامب.. اللي رجع للبيت الأبيض في يناير 2025.. أعلن عن سياسات جديدة خلّت الأسواق في حالة قلق.. أهمها فرض رسوم جمركية جديدة على الواردات لأمريكا.. الرسوم دي بتبدأ من 10% على معظم الدول.. وبتوصل لـ54% على دول زي الصين.. ترامب سمّى السياسة دي "استعادة ثراء أمريكا".. لكنها فعلياً هزّت التجارة العالمية وزادت المخاوف من تباطؤ الاقتصاد العالمي.
وفى الساعات الأخيرة ترامب هدد بفرض رسوم جمركية جديدة على الاتحاد الاوربي وكما هدد شركة عملاقة زي ابل بفرض رسوم 25 % على اجهزة ايفون اللى بتبيعها فى السوق الامريكي وتكون مصنع خارج الولايات المتحدة.
الدهب نفسه مش متأثر بالرسوم الجمركية دي.. وده اللي خلّاه جاذب أكتر للمستثمرين.. لما الناس شافت إن الأسهم والعملات ممكن تخسر قيمتها بسبب الحرب التجارية اللي بيقودها ترامب.. بدأت تحول استثماراتها للدهب.. الطلب الكبير ده هو اللي رفع الأسعار للأرقام القياسية دي.. كمان.. مؤشر الدولار الأمريكي نزل بنسبة 0.2% في الأيام الأخيرة.. وده خلّى الذهب أرخص للمستثمرين اللي بيستخدموا عملات تانية.. فزاد الطلب عليه أكتر..
لكن مش بس الدهب.. سوق الفضة كمان بيتأثر بنفس العوامل.. الفضة زي الدهب بتعتبر ملاذ آمن.. لكنها كمان ليها استخدامات صناعية كبيرة في التكنولوجيا والطاقة المتجددة.. في 2024.. أسعار الفضة قفزت بنسبة 40% في النص الأول من السنة.. ووصلت لـ32.7 دولار للأونصة.. وده بسبب التوترات الجيوسياسية وتوقعات خفض الفايدة الأمريكية وزيادة الطلب الصناعي.. لكن في مايو 2025.. الفضة لسه بتواجه مقاومة قوية عند مستوى 30 دولار.. وده يعني إنها بتتحرك بشكل أبطأ من الذهب.. بس مع استمرار الاضطرابات.. الخبراء بيتوقعوا إن الفضة ممكن تكمل صعودها في 2025.. خصوصاً مع زيادة الاستثمارات في الذكاء الاصطناعي والطاقة النظيفة.
في مصر.. أسعار الدهب بتتأثر بعوامل محلية كمان.. سعر الدولار مقابل الجنيه المصري شهد تراجع طفيف في الفترة الأخيرة.. بس لسه بيأثر على تكلفة استيراد الدهب.. يعني لو السعر العالمي للدهب مستقر.. أي تغيير في سعر الصرف بيحرّك أسعار محلات الصاغة.. كمان.. الإقبال على شراء الدهب في مصر انخفض بنسبة 16% في الربع الأول من 2025 مقارنة بـ2024.. بس الدهب لسه الخيار الأول للي عايز يحمي فلوسه من التضخم.
طليه ليه ترامب بالذات بيأثر على الدهب والفضة؟
سياساته التجارية بتخلّي الأسواق تخاف من ركود اقتصادي.. وده بيدفع المستثمرين يهربوا من الأسهم والسندات ويروحوا على الذهب والفضة.. كمان.. تصريحاته عن تقليل الاعتماد على الدولار كعملة احتياطية بتشجع دول زي الصين وروسيا تزود احتياطياتها من الذهب.. وده بيزود الطلب العالمي.. لكن الصين.. اللي كانت أكبر مشتري للذهب في 2024.. قلّلت مشترياتها في مايو 2025 لما الأسعار وصلت لمستويات قياسية.. وده خلّى السوق أكتر تقلباً.
طب والخبراء بيقولوا إيه عن الفترة الجاية؟
أسعار الدهب ممكن توصل لـ3500 دولار للأونصة في بداية 2026.. وتوصل لـ4000 دولار بنهاية 2027 لو استمرت الأزمات.. أما الفضة.. فالتوقعات بتقول إنها هتكمل صعودها بس بوتيرة أبطأ.. لكن لو البنك الفيدرالي الأمريكي شدّد سياسته النقدية ورفع الفايدة.. الذهب والفضة ممكن يتراجعوا شوية.. لأن الأصول التانية هتبقى أكتر جاذبية.
