ليه الرئيس السيسي مهتم جدا بملف الاحتياطي النقدي لمصر
ايه سر الاجتماعات الكتيرة بين الرئيس السيسي ومحافظ البنك المركزي المصري.. وليه الرئيس مهتم جدا بملف الاحتياطي النقدي لمصر وليه بيوجه في كل مرة بتعزيز احتياطيات الدولة من النقد وكمان السلع الاستراتيجية.
لو متابعين صفحة المتحدث الرسمي باسم رئاسة الجمهورية هتعرفوا إن المصرفي الكبير حسن عبد الله محافظ البنك المركزي المصري كان ضيف مستمر في قصر الجمهورية على مدار الفترة اللي فاتت ودا لحضور اجتماعات مع مهمة جدا مع الرئيس السيسي.. لو بتسأل ليه كل الاجتماعات دي.. فهنقولك إن الملف المالي والاقتصادي هو الأولوية القصوى عند الرئيس السيسي وخاصة مع التطورات اللي بتحصل في المنطقة والعالم من حولينا والاضطرابات الكتيرة في أسواق السلع والطاقة وغيرها.
ليه الرئيس السيسي بيتابع تفاصيل الوضع الاقتصادي اول بأول ؟
عشان رئيس الجمهورية اكتر حد في مصر عنده معلومات وكواليس وأسرار اللي بيحصل في العالم والمنطقة وعارف أن تأمين احتياجات مصر من المنتجات والسلع والخدمات في مقدمة الأولويات ولأن الرئيس عاوز يجنب مصر اي هزات في الأسواق العالمية أو التعرض لضغوط اقتصادية بسبب الأحداث دي .. يعني مش عاوز بسبب حاجة للصدفة.
اخر اجتماعات الرئيس السيسي مع محافظ البنك المركزي المصري كانت يوم الخميس اللي فات في القصر الجمهوري واللي كان حاضرها الدكتور مصطفى مدبولي رئيس الحكومة وفي الاجتماع دا الرئيس استمع لتقارير مهمة حولين الوضع الاقتصادي بشكل عام والمؤشرات المالية والرئيس السيسي كانت ليه توجيهات واضحة جدا وخاصة في ملف الاحتياطي النقدي لمصر واللي طالب دائما بتعزيزه وزيادته عشان دا الملف الأهم دلوقتي ولأنه احتياطي ضد أي أزمة ممكن تحصل حولينا ... وعشان كده الرئيس وجه بتعزيز جهود الحكومة لتعزيز أداء القطاع المصرفي بالدولة والمؤشرات الخاصة بتعزيز احتياطات الدولة من النقد الأجنبي وضمان إستمرارية توافر الاحتياطيات الكافية من النقد الأجنبي بجانب الجهود المبذولة للإستمرار في خفض معدلات التضخم.
ودا لأن الاحتياطي النقدي هو صمام أمان للدولة المصرية وضمان عدم حدوث هزات في الأسواق وضمان كمان وجود سقف زمني كبير للسلع الاستراتيجية اللي بتغطيتها الاحتياطي النقدي وبيضمن الاستقرار في سوق الصرف كمان.
اجتماع الرئيس السيسي ومحافظ المركزي تطرق كمان إلى محاور تانية مهم خاصة بأداء الإقتصاد المصري وجهود الحكومة لضمان التنفيذ الناجح والفعال لبرنامج التنمية الإقتصادية وعدم تأثرها بالتحديات الإقليمية والدولية الراهنة ودا الغرض من الاجتماع أن مصر تحاول تتجنب اي أزمات حوليها عشان مايحصل تعطيل في برامج الاقتصاد والاستثمار والتنمية... الرئيس طلب كمان تعزيز وإتاحة الفرص للقطاع الخاص لدفع النمو الإقتصادي وجذب مزيد من الاستثمارات الأجنبية والعربية للسوق المحلية وطرح المبادرات التحفيزية مع الحفاظ على التحسن في مؤشرات الإقتصاد الكلي.
