مركز عالمي في صناعة السيارات.. التكنولوجيا اليابانية وصلت
ايه اللي بيحصل في ملف الصناعة .. وازاي مصر هتحول لمركز عالمي في صناعة السيارات الحديثة.. وايه اللي قاله الدكتور مصطفى مدبولي النهاردة وهل دا ممكن يحصل فعلاً.
النهاردة الدكتور مصطفى مدبولي افتتح أكبر مصنع لشركة “سوميتومو” اليابانية في العالم بمدينة العاشر من رمضان على مساحة 150 ألف متر مربع.. واللي مايعرفش سوميتومو فدي شركة عالمية رائدة في صناعة ضفائر السيارات والوصلات الكهربائية واللي بتعتبر من أهم الصناعات المغذية لصناعة السيارات وبتعتبر الشركة وحش ياباني في الصناعة المهمة دي..
ولو متعرفش بردو الوحش الياباني المتخصص في صناعة مكونات السيارات قدر في فترة قليلة إنه يحول مصر إلى مركز إقليمي لصناعة وتصدير منتجاتها .. ودا لأن الشركة اليابانية يتملك سلسلة مصانع موزعة على 3 مدن مصرية وبتصدر سنويا بقيمة 300 مليون يورو وبيتم توريد كامل إنتاجها من ضفائر السيارات الكهربائية إلى مصانع السيارات في أوروبا.. اكيد طبعا عرفت قد ايه الشركة اليابانية بتعمل ايه في مصر .. ببساطة دي بتكون صناعة معقدة جداً ودقيقة في واحد من أهم قطاعات الصناعة دلوقتي وهو صناعة السيارات الحديثة وكلنا عارفين إن اليابان رائدة في الصناعة دي تحديدا.. ولازم نعرف إن توطين صناعة السيارات في مصر مش هيحصل غير بتوطين صناعة مكونات السيارات في الأول.
رئيس مجلس الوزراء الدكتور مصطفى مدبولي قال كلام مهم جدا خلال افتتاح المصنع الياباني الجديد زي إن صناعة الضفائر الكهربائية واحدة من الصناعات الدقيقة .. وقال كمان إن مصر بدأت فعلا تكون مركز عالمي لتصنيع مكونات صناعة السيارات، واللي أصبحت تصدر إلى كل مصانع السيارات حول العالم ... رئيس الحكومة قال كمان إن ملف الصناعة في قمة أولويات الدولة والمجموعة الوزارية للتنمية الصناعية وإن الحكومة بتعمل على تسهيل الإجراءات وتوفير المرافق وإصدار الرخص الذهبية ومع الشركات الجادة زي شركة "سوميتومو".
وعلى فكرة المصنع الجديد للشركة اليابانية ورغم أن حجمه ضخم لكن انتهى من الإنشاءات خلال سنة واحدة بالتحديد وبدأ المصنع في التشغيل الفعلية ودا الجديد في ملف الصناعة أن المصنع بيخلص في زمن قياسي بداية من اصدار التراخيص وصولا إلى مرحلة الإنتاج ودا من أهم عوامل جذب الاستثمارات الجديدة في الصناعة لأن عامل الوقت بيكون مهم وتسهيل الإجراءات الحكومية بيكون أهم حاجة عند المستثمرين..
مدبولي قال كمان إن الحكومة بتستهدف دلوقتي كل أنواع الشركات في صناعة السيارات بداية من الشركات المتوسطة وصغيرة الحجم بجانب الشركات العالمية العملاقة عشان يكون فيه زخم في الإنتاج والتصدير وكشف حاجة مهم جدا كمان وهي إن الفترة الجاية هيكون فيه افتتاحات لمصانع كبيرة تانية سواء في نفس مجال صناعة السيارات أو لمختلف الصناعات التانية في مختلف المدن الصناعية.
