نهاية الدولار تقترب.. تحالف ثلاثي يخطط لإنهاء هيمنة العملة الأمريكية
يا ترى إيه اللي بيحصل في عالم الاقتصاد دلوقتي؟ .. ليه دول زي البرازيل والصين وروسيا بيدوروا على بديل للدولار؟ .. هل فعلاً ممكن يقدروا يهزوا عرش العملة الأمريكية اللي بتحكم العالم من سنين ؟ وهل أمريكا هتفضل ساكتة وتتفرج وهي شايفة عملتها بتترنح ولا هترد بقوة.
الدولار الأمريكي مش بس عملة.. ده رمز للهيمنة الاقتصادية .. من بعد الحرب العالمية التانية والدولار هو اللي بيحرك التجارة العالمية .. تقريباً 60% من احتياطيات البنوك المركزية في العالم بالدولار .. ومعظم صفقات النفط والغاز بتتم بعملة أمريكا .. بس في السنين الأخيرة بدأت دول كبيرة زي الصين وروسيا والبرازيل ومعاهم دول تانية في مجموعة بريكس يحسوا إن الاعتماد ده على الدولار بقى عبء.. عشان الدولار مش بس عملة .. ده أداة سياسية كمان.
خد عندك روسيا مثلاً .. بعد الحرب الأوكرانية والعقوبات الغربية اللي جمدت حوالي 300 مليار دولار من احتياطياتها .. روسيا قررت إنها لازم تبعد عن الدولار .. بدأت تستخدم الروبل واليوان الصيني في صفقاتها مع دول زي الصين وتركيا والهند .. الصين كمان مش مرتاحة .. هي الاقتصاد التاني في العالم وبتحلم إن اليوان يبقى عملة عالمية .. بس الدولار واقف في طريقها .. والبرازيل؟ .. دي بتحب تكون مستقلة ومش عايزة تبقى رهينة لتقلبات الدولار اللي بتأثر على اقتصادها.
السؤال المهم .. إيه اللي بيعملوه عشان يلاقوا بديل للدولار؟
دول بريكس بيحاولوا يزودوا التجارة بينهم بالعملات المحلية .. يعني الصين بتبيع للبرازيل باليوان .. وروسيا بتبيع نفط للهند بالروبل أو الروبية .. كمان بيفكروا في عملة مشتركة لمجموعة بريكس .. مش بالضرورة ورق زي اليورو .. ممكن يكون نظام دفع رقمي يربط بينهم .. الصين كمان بتدفع باليوان الرقمي وبتشجع دول تانية تستخدمه .. وفي 2023 السعودية بدأت تفكر تبيع نفط للصين باليوان .. لو ده حصل بجد .. دي هتبقى ضربة قوية للدولار.
بس.. هل ده معناه إن الدولار خلاص هيخسر مكانته؟
مش بالسرعة دي .. الدولار لسه قوي .. عشان أمريكا ليها اقتصاد ضخم وجيش قوي وسوق مالي متطور .. كمان الناس في العالم كله بيثقوا في الدولار كعملة مستقرة .. لو بدأت دول كتير تبيع النفط أو السلع الأساسية بعملات تانية .. زي اليوان أو الروبل .. ممكن الدولار يضعف فعلاً .. بس ده هياخد وقت .. يمكن سنين طويلة .. عشان تبني ثقة في عملة جديدة مش سهل.
وأمريكا هتعمل إيه؟ .. هتقف تتفرج؟
مستحيل .. أمريكا عارفة إن الدولار هو سلاحها الأقوى .. لو حسوا إن العملة بتضعف .. ممكن يستخدموا أدوات كتير .. زي فرض عقوبات اقتصادية أقوى .. أو يحاولوا يضغطوا على دول زي السعودية عشان يفضلوا متمسكين بالدولار في صفقات النفط .. كمان أمريكا ممكن تلعب على استقرار العملات التانية .. يعني لو اليوان بدأ ينتشر .. ممكن يحاولوا يخلوا قيمته تتذبذب عشان الناس تخاف تستخدمه.
الأكيد .. ان البرازيل والصين وروسيا بيحاولوا يكسروا هيمنة الدولار .. وده هدف طويل الأجل .. بس الطريق لسه طويل ومليان تحديات .. الدولار لسه متماسك .. وأمريكا مش هتسكت لو حسوا إن عرش عملتهم بيهتز.
