أيام صعبة للدهب.. إيه اللي هيحصل بعد نهاية الحرب التجارية بين أمريكا والصين؟
يا ترى إيه اللى هيحصل بعد توصل امريكا والصين لاتفاق تجاري ينهي نزاع الرسوم الجمركية؟ وإيه تاثير الاتفاق ده على الأسواق العالمية ؟ والذهب والدولار هيروحوا على فين الأيام الجاية؟
العالم كله النهاردة مشغول بأهم خبر اقتصادي حصل من فترة طويلة .. أمريكا والصين أعلنوا اتفاق تجاري يقلل الرسوم الجمركية بشكل كبير .. أمريكا خفضت الرسوم من 145% لـ30% .. والصين نزّلت رسومها من 125% لـ10% .. الخطوة دي جت بعد شهور من التوتر اللي خلّى الأسواق في حالة قلق.
وإيه تأثير الخبر ده على الأسواق؟
أول حاجة .. الاتفاق ده بيخفف الضغط على الاقتصاد العالمي .. يعني الشركات الأمريكية والصينية هتوفر تكاليف كبيرة .. وده خلّى مؤشرات الأسهم زي إس أند بي 500 وناسداك ترتفع بنسبة 1.5% في يوم الإعلان .. المستثمرين بقوا متفائلين .. وده بيدي إشارة إن الاقتصاد العالمي ممكن يستقر أكتر الفترة الجاية .. بس مش كل القطاعات هتستفيد بنفس الطريقة .. يعني مثلا النفط لسه تحت ضغط بسبب زيادة المخزونات الأمريكية.
نيجي بقى للدهب .. الدهب دايما بيبقى الملاذ الآمن وقت الأزمات .. لما كان فيه توتر تجاري .. سعر الدهب كان وصل حوالي 3500 دولار للأونصة .. لكن بعد الاتفاق .. الدهب بدأ يتراجع .. النهاردة الأونصة نزلت لحوالي 3225 دولار .. يعني خسارة 3% في يوم واحد .. لأن المستثمرين بقوا أقل خوف وبدأوا يتحركوا ناحية الأسهم والسندات .. المتوقع إن الدهب يفضل يتراجع شوية ويستقر حوالين 3200-3250 دولار في الأيام الجاية .. بس لو الاتفاق ده اتعطل أو ظهرت مشاكل جديدة .. الدهب ممكن يرجع يطلع ويوصل 3400 دولار تاني.
طب الدولار أخباره إيه ؟
الدولار ارتفع بعد الإعلان .. مؤشر الدولار قصاد العملات الرئيسية زاد بنسبة 0.8% لأن الاقتصاد الأمريكي بيستفيد من الاستقرار ده .. والمستثمرين بيرجعوا يشتروا الدولار كعملة قوية .. في نفس الوقت .. اليوان الصيني كمان اكتسب قوة بسبب توقعات إن الصين هتستفيد من الاتفاق .. الفترة الجاية .. الدولار هيفضل مستقر أو يقوى شوية .. بس لو البنك الاحتياطي الفيدرالي غيّر سياسة الفايدة .. ممكن نشوف تغيرات أكبر.
الأسواق دلوقتي في حالة ترقب .. الكل عايز يعرف إيه الخطوة الجاية .. لو الاتفاق استمر .. الأسهم هتفضل في صعود .. والدهب هيتراجع أو يستقر .. والدولار هيحافظ على مكانته .. بس لو ظهرت أي عقبات .. زي مثلا مفاوضات جديدة تفشل .. الدهب هيرجع يلمع .. والأسهم ممكن تتخبط .. قطاع النفط كمان لازم نراقبه .. لأن أسعار خام برنت وتكساس لسه متقلبة بسبب مخاوف من ضعف الطلب العالمي.
فلو بتستثمر .. خليك متابع الأخبار يوم بيوم .. ركز على تصريحات البنك الاحتياطي الفيدرالي .. وخلّي عينك على الدهب والدولار .. الأسواق دلوقتي زي لعبة الشطرنج .. لازم تكون مستعد لكل حركة.
