مشروعات بمليارات الدولارات في قطاعات حيوية.. تعاون هيغير قواعد اللعبة بين مصر والسعودية
يا ترى ايه حكاية المشروعات المشتركة اللى بتتفاوض عليها مصر والسعودية ؟ وايه القطاعات الاستثمارية اللى السعودية حاطة عينها عليها في مصر؟ وحجم الاستثمارات بين البلدين وصل لحد فين؟
العلاقة بين مصر والسعودية قوية من زمان .. بس اللي بيحصل دلوقتي هو تطور كبير في التعاون الاقتصادي .. الدكتور مصطفى مدبولي رئيس الوزراء المصري قال مؤخرا إن السعودية هتضخ 5 مليار دولار في مشروعات مشتركة مع مصر .. ده غير الـ 35 مليار دولار استثمارات موجودة فعلاً من أكتر من 7000 شركة سعودية في السوق المصري .. يعني حجم استثمارات كبير جداً بيظهر ثقة قوية في الاقتصاد المصري.
طب إيه هي المشروعات المشتركة؟
من أهم المشروعات اللي بيتم الحديث عنها هو صندوق استثماري عقاري مشترك بين مصر والسعودية .. الصندوق ده بيركز على تطوير مدن جديدة زي العاصمة الإدارية والعلمين الجديدة والمنصورة الجديدة .. وكمان بيستهدف مشروعات في المدن السياحية .. السعودية مش بس بتمول .. لكن كمان بتقدم خبرات فنية وهندسية من مشروعات زي نيوم والرياض الكبرى .. ده بيخلي جودة التنفيذ أعلى.
كمان في مشروعات في الصناعة .. زي إنشاء مصانع مشتركة للأدوية ومستحضرات التجميل .. في مايو 2025 .. 11 مستثمر مصري وسعودي قالوا إنهم هيستثمروا 5 مليار ريال في مصانع جديدة بالسعودية .. وفي مصر.. السعودية بتفكر تزود استثماراتها في الصناعات الغذائية والسيارات والثروة المعدنية.
مشروع آخر مهم هو الربط الكهربائي بين البلدين .. لحد يوليو 2024 .. تم إنجاز 60% من المشروع ده بتكلفة 1.8 مليار دولار .. ومن المقرر إن المرحلة الأولى تبدأ في يوليو 2025.
طب السعودية بتستهدف إيه في مصر؟
السعودية عينها على قطاعات كتير في مصر .. أولها العقارات .. السوق العقاري المصري بيعتبر واعد بسبب مشروعات المدن الجديدة والطلب المتزايد .. تاني حاجة الصناعة .. خصوصاً الأدوية والصناعات الغذائية .. لأن مصر عندها سوق كبير وإمكانيات تصنيع قوية .. كمان السياحة .. السعودية بتفكر تستثمر في فنادق ومنتجعات في البحر الأحمر وجنوب سيناء .. وأخيراً الطاقة المتجددة .. زي مشروعات الطاقة الشمسية وطاقة الرياح .. لأن مصر عندها خطط طموحة في المجال ده.
طب التعاون الاقتصادي بين البلدين وصل لفين؟
حجم التبادل التجاري بين مصر والسعودية وصل لأكتر من 7.5 مليار دولار في 2024 .. والبلدين بيستهدفوا يوصلوه لـ 8.1 مليار دولار في 2025 .. ده غير إن السعودية بتخطط تزود استثماراتها في مصر من 35 مليار دولار لـ 50 مليار دولار خلال 4 سنين .. يعني في الفترة من 2025 لـ 2029.
في مارس 2025 .. تم توقيع اتفاقية لحماية وتشجيع الاستثمارات بين البلدين .. الاتفاقية دي بتسهل على المستثمرين دخول السوقين وبتحل أي مشاكل بسرعة .. كمان الحكومة المصرية بتحل مشاكل المستثمرين السعوديين .. وقالوا إن 14 مشكلة لسه قايمة هيتم حلها قبل نهاية 2025.
القطاع الخاص كمان بيلعب دور كبير .. في أبريل 2025 .. وفد من الشركات الصناعية المصرية هيزور السعودية عشان يناقشوا شراكات جديدة .. وفي المقابل .. أكتر من 700 ألف سعودي مقيمين في مصر بيساهموا في الاقتصاد.
طب إيه اللي جاي؟
التعاون ده مش هيقف عند الاستثمارات وبس .. مصر والسعودية بيفكروا يعملوا تحالف اقتصادي يساعدهم يدخلوا أسواق جديدة زي إفريقيا .. كمان بيركزوا على الأمن الغذائي والدوائي .. يعني مشروعات زي الصناعات الغذائية والأدوية هتكون أولوية .. ده غير إن البلدين عايزين يعملوا تكامل صناعي .. بحيث كل دولة تستفيد من المزايا بتاعت التانية .
الأكيد.. الشراكة بين مصر والسعودية بتثبت إن التعاون العربي ممكن يعمل فرق كبير .. سواء في حجم الاستثمارات أو في المشروعات اللي هتخدم اقتصاد البلدين.
