مفاجأة الـ 73 مليار دولار.. الاقتصاد المصري ينطلق
إيه المفاجأة اللي أعلن عنها صندوق النقد الدولي لمصر .. وايه حكاية المليارات اللي هتدخل البنك المركزي المصري.. وايه التوقعات الكبرى للاقتصاد المصري في الأيام الجاية.
معروف إن نمو أي اقتصاد في أي دولة هو عبارة عن مجموعة مؤشرات مختلفة من مؤسسات دولية متخصصة واللي بتقول ببساطة كده الاقتصاد رايح على فين.. والمؤشرات أو التوقعات أو البيانات دي بتكون على المدى القصير والطويل.. فياتري المؤسسات المالية الدولية قالت إيه عن الاقتصاد المصري.
لو حضرتك متابع أخبار إقتصاد هتعرف إن صندوق النقد الدولي طلع تقرير حديث تحت اسم الآفاق الاقتصادية لمنطقة الشرق الأوسط ووسط آسيا.. وتوقع التقرير لمصر باعتبارها دولة شرق أوسطية ارتفاع احتياطي مصر من النقد الأجنبي بنسبة 16% خلال السنوات الخمس سنين اللي جاية ليصل إلى 73 مليار دولار مقارنة بـ 44.9 مليار دولار في العام المالي الحالي.
وحسب التقرير نفسه متوقع ارتفاع الاحتياطي الأجنبي لمصر إلى 49 مليار دولار في العام المالي الجاي بزيادة قدرها 5 مليارات دولار عن الارقام الحالية.
طيب التوقعات دي بتدي مؤشرات لايه بالظبط ؟
اكيد ارتفاع الاحتياطي النقدي لمصر بشكل مضطرد معناه تحسن الوضع الاقتصادي والمالي للدولة المصرية بشكل كبير وإيجابي ودا معناه بردو توافر الدولار في السوق المصري في السنين الجاية ومعناها بالتالي استقرار سوق الصرف بسبب توقعات إستمرار التدفقات الدولارية للسوق المصري وكمان معناه زيادة موارد الدولة الدولارية من كافة القطاعات.
طبعا أرقام صندوق النقد الدولي معناها كمان رسالة ثقة جديدة للاقتصاد واستمرار تحقيق معدلات نمو كبيرة لأن أرقام الاحتياطي جزء من أرقام تانية إيجابية أعلنها صندوق النقد زي ارتفاع معدلات النمو بشكل عام وكمان زيادة إجمالي حجم الاقتصاد الكلي وزيادة الناتج القومي المحلي.
اي توقعات إيجابية لصندوق النقد الدولي معناها كمان زيادة ثقة باقي المؤسسات المالية الدولية في الاقتصاد المصري وضمان رفع تصنيف مصر الائتماني في الفترات الجاية ودا بيؤدي بشكل مباشر لزيادة التدفقات الاستثمارية للأسواق المصرية والقطاعات الاقتصادية المختلفة وشفنا صفقات بمليارات الدولارات في الفترة الأخيرة وخاصة في قطاع الطاقة والصناعة وخاصة من دول الخليج العربي والصين وبيقول إن مصر ماشية على الطريق الصحيح لتحقيق انطلاقة نوعية على المستوى الاقتصادي والمالي.
